Sosial Yeniliklər Düşərgəsi (SYD) nədir?

SYD internetlə bağlı sosial ideyaların düşərgəyə qədər qəbulu, onlar içindən seçilən 6 ideyanın düşərgədə reallaşdırılması və sonda ən yaxşısının mükafatlandırılması müsabiqəsidir.

SYD kimlər üçündür?

SYD internet və kompüter sahəsində heç bir xüsusi bacarığı olmasa da əla sosial internet layihə ideyası olan istənilən şəxslər, eləcə də proqramçı, veb developer, koder, dizayner, marketoloq, brend mütəxəssisləri, biznes düşüncəli insanlar və bu kateqoriyalara aidiyyəti olan digər şəxslər üçündür.

SYD-yə necə qatılmaq olar?

SYD-yə 2 formada qatılmaq olar:

1. İdeya sahibi qismində. Bunun üçün İdeya göndərin bölməsində olan formanı 1 sentyabr saat 23:59-a qədər doldurub göndərmək tələb olunur.
2. İştirakçı qismində. Bunun üçün İştirak üçün müraciət edin bölməsində olan formanı 1 sentyabr saat 23:59-a qədər doldurub göndərmək lazımdır.

Hazırda həm ideya göndərmək, həm də iştirakçı kimi müraciət etmək üçün ayrılmış vaxt bitmişdir.

Həm ideya sahibi, həm də iştirakçı qismində qatılmaq olarmı?

Siz hər 2 formanı doldurub göndərə bilərsiniz, lakin Sizin hansı qismdə düşərgədə iştirak edəcəyiniz Sizin ərizə formanızda yazacağınız göstəricilərdən asılı olaraq münsiflər tərəfindən qiymətləndiriləcək.

SYD-yə qatılmaq üçün yaş, cins, peşə və s. məhdudiyyət varmı?

SYD-yə qatılmaq üçün heç bir belə məhdudiyyət yoxdur.

SYD-yə qatılanların hansı xərcləri təşkilatçılar tərəfindən qarşılanır?

SYD-yə regionalardan qatılanların yemək, qalmaq və nəqliyyat xərcləri (müvafiq çeklər təqdim olunarsa), Bakıdan qatılanların isə ancaq yemək xərcləri təşkilatçılar tərəfindən qarşılanacaq.

SYD-yə bir nəfər bir neçə ideya verə bilərmi?

SYD-yə bir nəfər bir neçə ideya verə bilər, ancaq düşərgəyə bir nəfərin ən çoxu bir ideyası buraxılacaq.

SYD-də mükafat nə qədər olacaq?

Hal-hazırda bir sıra səbəblər üzündən bu məbləğin açıqlanması məqsədəuyğun hesab olunmur. Amma əmin ola bilərsiniz ki, düşərgədə həyata keçirəcəyiniz layihənin qalib gələcəyi təqdirdə qazanacağınız mükafat Sizə bəs edəcək, çünki nəzərdə tutulan məbləğ dünyanın digər ölkələrində keçirilmiş Sosial Yeniliklər Düşərgəsinin qaliblərinə verilmiş məbləğə uyğun olacaq.

SYD-də münsiflər heyətində kim olacaq?

Münsiflər heyətinin əksəriyyəti xaricdə bu tipli düşərgələr təşkil etmiş və ya münsiflər heyətində olmuş xarici ekspertlər və az bir qismi Azərbaycandan olan ekspertlər olacaq.

SYD-də iştirak üçün seçilənlərin siyahısı nə vaxt məlum olacaq?

Seçilənlərin siyahısı sentyabrın ilk həftəsində məlum olacaq və seçilmiş şəxslərə bu barədə məlumat veriləcək.

SYD nə vaxt keçiriləcək?

Sosial Yeniliklər Düşərgəsi sentyabrın 18-19-da keçiriləcək.